სოხუმის ილია ვეკუას ფიზიკა-ტექნიკის ინსტიტუტს (სფტი) დაარსებიდან 70 წელი შეუსრულდა.
“ამ საიუბილეო დღეს შეიძლება თამამად განვაცხადოთ, რომ 70 წლის წინ საქართველოში მაღალი ტექნოლოგიების უნიკალური ცენტრი დაარსდა, რაც მეტად მნიშვნელოვანი და პროგრესული ნაბიჯი იყო.
ინსტიტუტი გამოჩენილი გერმანელი მეცნიერების მონაწილეობით ყალიბდებოდა. აქ მოღვაწეობდნენ მანფრედ ფონ არდენე და გუსტავ ჰერცი, შემდგომში ნობელის პრემიის ლაურეატები და დიდი აღმოჩენების ავტორები, რომელთა შრომებმა მნიშვნელოვანი ბიძგი მისცეს მსოფლიო მეცნიერების პროგრესს.
პირველი ბირთვული იარაღის შექმნის ამოცანით განსაზღვრული საკითხების წარმატებით გადაწყვეტის შემდგომ ინსტიტუტი აგრძელებდა წარმატებულ მუშაობას რიგ ფუნდამენტურ სამეცნიერო პრობლემებზე, ათეულობით წლების განმავლობაში მნიშვნელოვანი წვლილი შეჰქონდა ქვეყნის და მსოფლიო სამეცნიერო პოტენციალის ამაღლების საკითხებში.
ეს ტრადიცია დღესაც გრძელდება, ინსტიტუტი ჯეროვან სიმაღლეზეა და თავისი წვლილი შეაქვს როგორც ქართული, ასევე საერთაშორისო სამეცნიერო პოტენციალის გაზრდაში.
დრამატული იყო სოხუმის ფიზიკა-ტექნიკის ინსტიტუტის ბედი და განვითარების ისტორია.
აფხაზეთში განვითარებულმა სამხედრო კონფლიქტმა მძიმე დარტყმა მიაყენა ინსტიტუტს და საფრთხე შეუქმნა მის არსებობას. ინსტიტუტის ათეულობით თანამშრომელი შეეწირა ომს.
ინსტიტუტმა წლების განმავლობაში შექმნილი სამეცნიერო-ტექნოლოგიური კერა მიატოვა და თბილისში დაფუძნდა, როგორც ფენიქსი აღსდგა ფერფლიდან და საქართველოს მთავრობის, საერთაშორისო სამეცნიერო საზოგადოების და ქართველი მეცნიერების დაუღალავი შრომით კვლავ დაადგა აღორძინების გზას.
ინსტიტუტში დღესდღეობით ვითარდება მრავალი სამეცნიერო და ტექნოლოგიური მიმართულება, მათ შორის ზოგიერთი უკვე დანერგვის სტადიაში – ინსტიტუტის სათავო ორგანიზაციის სსსტც „დელტა“-ს ძირითად საწარმოებში.
ფიზიკა-ტექნიკის ინსტიტუტის დღევანდელი ხელმძღვანელობის გეგმაზომიერი და მიზანმიმართული საქმიანობა შემდგომი წარმატების საწინდარია.
სიამაყით შეიძლება ითქვას, რომ დღეს სოხუმის ილია ვეკუას ფიზიკა-ტექნიკის ინსტიტუტი სახელმწიფო სამხედრო სამეცნიერო ტექნიკურ ცენტრ „დელტა“-ს შემადგენლობაშია და სხვა სამეცნიერო-კვლევით ინსტიტუტებთან ერთად ყოველწლიურად მეტი და მეტი წვლილი შეაქვს ქვეყნის აღმშენებლობის საქმეში.
ვუსურვებთ სოხუმის ილია ვეკუას ფიზიკა-ტექნიკის ინსტიტუტს შემდგომ წარმატებებს კაცობრიობის სამეცნიერო განვითარებისა და პროგრესისთვის.”
უჩა ძოძუაშვილი
სახელმწიფო სამხედრო სამეცნიერო ტექნიკური ცენტრი „დელტას“ გენერალური დირექტორი
This work is licensed under a Creative Commons Attribution 4.0 International License.
M-4 ტიპის ავტომატური ცეცხლსასროლი იარაღის წარმოების მიზნით, ახალი ქართულ-ებრაული საწარმო სსსტც „დელტას“ ტერიტორიაზე წლის ბოლოს ამოქმედდება. ურთიერთთანამშრომლობის შესახებ შეთანხმებას საქართველოს თავდაცვის მინისტრმა ჯუანშერ ბურჭულაძემ და ებრაული კომპანიის წარმომადგენლებმა დღეს მოაწერეს ხელი.
„დელტას“ პატრონაჟით, თანამედროვე ტექნიკით აღჭურვილ საწარმოში M-4 ტიპის ავტომატური ცეცხლსასროლი იარაღის სრული ტექნოლოგიური პროცესი წარიმართება.
M-4 ტიპის ავტომატური ცეცხლსასროლი იარაღის ადგილობრივი წარმოების პროექტის განხორციელების პროცესი ირაკლი ღარიბაშვილის თავდაცვის მინისტრობის პერიოდში დაიწყო.
სამომავლოდ განიხილება საწარმოს ფუნქციური დატვირთვის გაზრდა და სხვადასხვა ცეცხლსასროლი იარაღისა და აქსესუარების წარმოება. ასევე, საწარმოში შესაძლებელი იქნება სხვადასხვა ტიპის იარაღის მოდერნიზებაზე მუშაობა. პროექტის მიხედვით, საწარმოში დამზადებული იარაღი თავდაცვის ძალებს გადაეცემა. ასევე, დაგეგმილია პროდუქციის საექსპორტო წარმოება.
სსსტც „დელტას“ დღეიდან ზურაბ ჯაველიძე უხელმძღვანელებს. ახალი დირექტორი თანამშრომლებს საქართველოს თავდაცვის მინისტრმა ჯუანშერ ბურჭულაძემ წარუდგინა და საპასუხისმგებლო საქმიანობაში წარმატებები უსურვა.
მინისტრმა საქართველოს პრემიერ-მინისტრის ინიციატივით განხორციელებულ და დაწყებულ პროექტებსა და სამომავლო გეგმებზე გაამახვილა ყურადღება და განაცხადა, რომ მალე „დელტაში“ რამდენიმე საერთაშორისო ერთობლივი საწარმო დაიწყებს ფუნქციონირებას. უკვე ყოფილ თანამშრომლებს მიესალმა ზურაბ აზარაშვილიც, რომელიც „დელტას“ ერთი წლის განმავლობაში ხელმძღვანელობდა და ამჟამად თავდაცვის მინისტრის მოადგილეა. მან თანამშრომლებს ნაყოფიერი თანამშრომლობისთვის მადლობა გადაუხადა, ახალ ხელმძღვანელს კი, გუნდთან ერთად დაწყებული პროექტების წარმატებით დასრულება უსურვა.
ზურაბ ჯაველიძე პროფესიით ენერგეტიკოსი და საბანკო საქმის სპეციალისტია. „დელტას“ ხელმძღვანელად დანიშვნამდე მას შპს „კავკასენერგოს“ გენერალური დირექტორის თანამდებობა ეკავა, სხვადასხვა დროს მუშაობდა სს „საქენერგორემონტსა“ და სს „ენერგომონტაჟრემონტში“ ხელმძღვანელ პოზიციებზე.
თავდაცვის ძალების კუთვნილმა პირველმა მოდერნიზებულმა თვითმფრინავმა, სუ-25-მა რემონტის შემდგომი საგამოცდო ფრენა წარმატებით განახორციელა. სუ–25 ტიპის თვითმფრინავის აღდგენა-მოდერნიზაცია სააქციო საზოგადოება „თამ“ თბილავიამშენისა და სსსტც „დელტა“-ს ერთობლივი თანამშრომლობით, თავდაცვის სამინისტროს ავიაციისა და საჰაერო თავდაცვის სარდლობის ჩართულობითა და ზედამხედველობით განხორციელდა.
სუ-25 ტიპის თვითმფრინავის აღნიშნული მოდიფიკაცია ორმაგი დანიშნულებისაა, რაც იძლევა საბრძოლო და სასწავლო ფრენების განხორციელების შესაძლებლობას. ყოველ მომდევნო საფრენ აპარატებზე შემდგომი საგამოცდო ფრენები ეტაპობრივად, ხელშეკრულებით განსაზღვრული გრაფიკის მიხედვით განხორციელდება.
სააქციო საზოგადოება „თამ“ თბილავიამშენის აეროდრომზე განახლებული საფრენი აპარატის საცდელ ფრენას თავდაცვის მინისტრი ჯუანშერ ბურჭულაძე, თავდაცვის ძალების ხელმძღვანელი პირები და პარლამენტის თავდაცვისა და უშიშროების კომიტეტის თავმჯდომარე დაესწრნენ.
თავდაცვის ძალების ავიაციის პარკის განახლების პროექტი ირაკლი ღარიბაშვილის თავდაცვის მინისტრობის დროს დაიწყო და წარმატებით მიმდინარეობს. ავიაციის განვითარების მიზნით, 2020 წლის ივლისში საქართველოს თავდაცვის სამინისტროსა და სააქციო საზოგადოება „თამ“ თბილავიამშენს შორის ხელშეკრულება გაფორმდა, რომელიც საქართველოს თავდაცვის ძალების ბალანსზე არსებული სუ-25 ტიპის თვითმფრინავის მოდერნიზაციასა და კაპიტალურ რემონტს ითვალისწინებს.
ავიაციის პარკის განახლების აქტიური ფაზა 2020 წლის აგვისტოდან დაიწყო და თავდაცვის ძალების კუთვნილი საფრენი აპარატების კაპიტალური რემონტი 2022 წლის ბოლომდე დასრულდება. საფრენი აპარატების აღდგენა-მოდერნიზაცია ხელშეკრულების გრაფიკის შესაბამისად მიმდინარეობს. პარალელურად, მფრინავები და ტექნიკური პერსონალი კვალიფიკაციისა და სპეციალობების შესაბამისად გადამზადებას გადიან. პირადი შემადგენლობის მომზადება როგორც ადგილზე, ასევე მეგობარი და პარტნიორი ქვეყნების მხარდაჭერით მიმდინარეობს
სამეცნიერო-ტექნიკური ცენტრი "დელტა" - ქართული სამხედრო მრეწველობა
